1041-1050

 நல்குரவு

குறள் எண்: 1041

இன்மையின் இன்னாதது யாதெனின் இன்மையின் 

இன்மையே இன்னா தது.

உரை :

வறுமையைப் போல் துன்பமானது எது என்று கேட்டால், வறுமையைப் போல் துன்பமானது வறுமை ஒன்றே ஆகும்.

குறள் எண்: 1042

இன்மை எனவொரு பாவி மறுமையும் 

இம்மையும் இன்றி வரும்.

உரை :

வறுமை என்று சொல்லப்படும் பாவி ஒருவனை நெருங்கினால், அவனுக்கு மறுமையின்பமும், இன்மையின்பமும் இல்லாமற் போகும் நிலைமை வரும்.

குறள் எண்: 1043

தொல்வரவும் தோலும் கெடுக்கும் தொகையாக 

நல்குரவு என்னும் நசை.

உரை :

வறுமை என்று சொல்லப்படும் ஆசைநிலை ஒருவனைப் பற்றினால், அவனுடைய பழைமையானக் குடிப் பண்பையும் புகழையும் ஒரு சேரக் கெடுக்கும்.

குறள் எண்: 1044

இற்பிறந்தார் கண்ணேயும் இன்மை இளிவந்த 

சொற்பிறக்கும் சோர்வு தரும்.

உரை :

வறுமை என்பது, நல்ல குடியிற் பிறந்தவரிடத்திலும் இழிவு தரும் சொல் பிறப்பதற்குக் காரணமான சோர்வை உண்டாக்கி விடும்.

குறள் எண்: 1045

நல்குரவு என்னும் இடும்பையுள் பல்குரைத் 

துன்பங்கள் சென்று படும்.

உரை :

வறுமை என்று சொல்லப்படும் துன்ப நிலையினுள் பலவகையாக வேறுபட்டுள்ள எல்லாத் துன்பங்களும் சென்று விளைந்திடும்.

குறள் எண்: 1046

நற்பொருள் நன்குணர்ந்து சொல்லினும் நல்கூர்ந்தார் 

சொற்பொருள் சோர்வு படும்.

உரை :

நல்ல நூற் பொருளை நன்றாக உணர்ந்து எடுத்துச் சொன்னப் போதிலும் வறியவர் சொன்ன சொற்பொருள் கேட்பார் இல்லாமல் பயன்படாமல் போகும்.

குறள் எண்: 1047

அறஞ்சாரா நல்குரவு ஈன்றதா யானும் 

பிறன்போல நோக்கப் படும்.

உரை :

அறத்தோடு பொருந்தாத வறுமை ஒருவனைச் சேர்ந்தால் பெற்றத் தாயாலும் அவன் அயலானைப் போல் புறக்கணித்துப் பார்க்கப்படுவான்.

குறள் எண்: 1048

இன்றும் வருவது கொல்லோ நெருநலும் 

கொன்றது போலும் நிரப்பு.

 உரை :

நேற்றும் கொலை செய்தது போல் துன்புறுத்திய வறுமை இன்றும் என்னிடம் வருமோ, (என்று வறியவன் நாள்தோறும் கலங்கி வருந்துவான்).

குறள் எண்: 1049

நெருப்பினுள் துஞ்சலும் ஆகும் நிரப்பினுள் 

யாதொன்றும் கண்பாடு அரிது.

உரை :

ஒருவன் நெருப்பினுள் இருந்து தூங்குதலும் முடியும், ஆனால் வறுமை நிலையில் எவ்வகையாலும் கண்மூடித் தூங்குதல் அரிது.

குறள் எண்: 1050

துப்புர வில்லார் துவரத் துறவாமை 

உப்பிற்கும் காடிக்கும் கூற்று.

உரை :

நுகரும் பொருள் இல்லாத வறியவர் முற்றுந் துறக்க கூடியவராக இருந்தும் துறக்காத காரணம், உப்புக்கும் கஞ்சிக்கும் எமனாக இருப்பதே ஆகும்.