1081-1090

தகையணங்குறுத்தல்

குறள் எண்: 1081

அணங்குகொல் ஆய்மயில் கொல்லோ கனங்குழை 

மாதர்கொல் மாலும்என் நெஞ்சு.

உரை :

தெய்வப் பெண்ணோ! மயிலோ, கனமான குழை அணிந்த மனிதப் பெண்ணோ, என் நெஞ்சம் மயங்குகின்றதே.

குறள் எண்: 1082

நோக்கினாள் நோக்கெதிர் நோக்குதல் தாக்கணங்கு 

தானைக்கொண் டன்ன துடைத்து.

உரை :

நோக்கிய அவள் பார்வைக்கு எதிரே நோக்குதல் தானே தாக்கி வருத்தும் அணங்கு, ஒரு சேனையையும் கொண்டு வந்து தாக்கினாற் போன்றது.

குறள் எண்: 1083

பண்டறியேன் கூற்றென் பதனை இனியறிந்தேன் 

பெண்டகையால் பேரமர்க் கட்டு.

உரை :

எமன் என்று சொல்லப்படுவதை முன்பு அறியேன், இப்பொழுது கண்டறிந்தேன், அது பெண் தனமையுடன் போர் செய்யும் பெரிய கண்களை உடையது.

குறள் எண்: 1084

கண்டார் உயிருண்ணும் தோற்றத்தால் பெண்டகைப் 

பேதைக்கு அமர்த்தன கண்.

உரை :

பெண்தன்மை உடைய இந்தப் பேதைக்குக் கண்கள் கண்டவரின் உயிரை உண்ணும் தோற்றத்தோடு கூடி ஒன்றோடொன்று மாறுபட்டிருந்தன.

குறள் எண்: 1085

கூற்றமோ கண்ணோ பிணையோ மடவரல் 

நோக்கமிம் மூன்றும் உடைத்து.

உரை :

எமனோ. கண்ணோ, பெண்மானோ, இந்த இளம் பெண்ணின் பார்வை இந்த மூன்றன் தன்மையும் உடையதாக இருக்கிறது.

குறள் எண்: 1086

கொடும்புருவம் கோடா மறைப்பின் நடுங்கஞர் 

செய்யல மன்இவள் கண்.

உரை :

வளைந்த புருவங்கள் கோணாமல் நேராக இருந்து மறைக்குமானால், இவளுடைய கண்கள் யான் நடுங்கும் படியான துன்பத்தைச் செய்யமாட்டா.

குறள் எண்: 1087

கடாஅக் களிற்றின்மேற் கட்படாம் மாதர் 

படாஅ முலைமேல் துகில்.

உரை :

மாதருடைய சாயாத கொங்கைகளின் மேல் அணிந்த ஆடை, மதம் பிடித்த யானையின் மேல் இட்ட முகப்படாம் போன்றது.

குறள் எண்: 1088

ஒண்ணுதற் கோஒ உடைந்ததே ஞாட்பினுள் 

நண்ணாரும் உட்குமென் பீடு.

உரை :

போர்க்களத்தில் பகைவரும் அஞ்சுதற்க்கு காரணமான என் வலிமை, இவளுடைய ஒளி பொருந்திய நெற்றிக்குத் தோற்று அழிந்ததே!

குறள் எண்: 1089

பிணையேர் மடநோக்கும் நாணும் உடையாட்கு 

அணியெவனோ ஏதில தந்து.

உரை :

பெண்மானைப் போன்ற இளமைப் பார்வையும் நாணமும் உடைய இவளுக்கு, ஒரு தொடர்பும் இல்லாத அணிகளைச் செய்து அணிவது ஏனோ?

குறள் எண்: 1090

உண்டார்கண் அல்லது அடுநறாக் காமம்போல் 

கண்டார் மகிழ்செய்தல் இன்று.

உரை :

கள், தன்னை உண்டவரிடத்தில் அல்லாமல் காமத்தைப் போல் தன்னைக் கண்டவரிடத்தில் மயக்கத்தை உண்டாக்குவதில்லையே.